काठमाडौं – नामी कलेजको आर्थिक सहयोग तथा स्टार्टअप डिस्कभरी एसियाको कार्यान्वयनमा सञ्चालित छ महिनाको नामी क्लाइमेट एआई उद्यम विकास कार्यक्रम को भव्य समापन १२ अगस्ट २०२६ मा द हिमालयन कोर्टयार्डमा सम्पन्न भएको छ ।

कार्यक्रमले कम्प्युटर विज्ञान, व्यवसाय प्रशासन तथा वातावरण विज्ञान का विद्यार्थीहरूलाई जलवायु परिवर्तनका चुनौतीलाई कृत्रिम बौद्धिकतामा आधारित, व्यावहारिक तथा विस्तार गर्न सकिने समाधानमा रूपान्तरण गर्न प्रोत्साहित गरेको थियो। कार्यक्रममार्फत १४ जना युवा संस्थापकले नौवटा उद्यम विकास गर्दै आफ्नो उद्यमशील यात्रालाई अघि बढाएका छन् । कार्यक्रमको प्रमुख आकर्षणका रूपमा आयोजित प्रदर्शन दिवस मा शिक्षा, उद्यमशीलता, विकास क्षेत्र, वित्त, लगानी पुँजी तथा प्रविधि क्षेत्रका करिब १३० जना सहभागी को उपस्थिति रहेको थियो । प्रदर्शन दिवसले युवा नवप्रवर्तनकारी, लगानीकर्ता तथा विभिन्न सरोकारवालाबीच सहकार्य, सञ्जाल विस्तार तथा सम्भावित लगानीका अवसरबारे संवाद गर्ने महत्वपूर्ण मञ्च प्रदान गरेको थियो ।

कार्यक्रम अन्तर्गत उत्कृष्ट प्रदर्शन गर्ने तीन टोलीलाई जनही रु. १ लाख प्रारम्भिक अनुदान प्रदान गरिएको थियो । रक्षा ले प्रभाव विस्तार सम्मान, ग्रिडफ्लक्सले कृत्रिम बौद्धिकताको उत्कृष्ट प्रयोग सम्मान तथा ल्होटा रिसाइक्लेबल्स ले उत्कृष्ट लगानीयोग्य उद्यम सम्मान प्राप्त गरेका छन् ।

नामी कलेज र स्टार्टअप डिस्कभरी एसियाको सहकार्यमा सञ्चालित यस कार्यक्रमलाई पाँच जना मार्गदर्शक, छ जना सहजीकरणकर्ता, तीन जना सल्लाहकार समिति सदस्य, ११ जना स्वयंसेवक तथा छ जना प्राविधिक प्रशिक्षक को महत्वपूर्ण सहयोग प्राप्त भएको थियो ।

फेब्रुअरीमा विद्यार्थीका रूपमा आफ्नो यात्रा सुरु गरेका सहभागीहरू अगस्टसम्म आइपुग्दा संस्थापक तथा नवप्रवर्तनकारीका रूपमा विकसित भएका छन् । कार्यक्रमले युवा प्रतिभालाई केवल व्यवसायिक अवधारणा विकास गर्न मात्र नभई जलवायु परिवर्तनका जटिल चुनौतीहरूलाई प्रविधिको माध्यमबाट सम्बोधन गर्न आवश्यक ज्ञान, सीप, मार्गदर्शन र सञ्जाल प्रदान गरेको आयोजकहरूले बताएका छन् ।

नामी क्लाइमेट एआई उद्यम विकास कार्यक्रमले नेपालमा जलवायु तथा कृत्रिम बौद्धिकता आधारित नवप्रवर्तन को नयाँ सम्भावनालाई उजागर गर्दै युवा उद्यमशीलता, रोजगारी सिर्जना तथा भविष्यका नेतृत्वकर्ताको विकासमा महत्वपूर्ण योगदान पु¥याउने अपेक्षा गरिएको छ ।