काठमाडौं – काठमाडौं उपत्यका अपराध अनुसन्धान कार्यालयका प्रमुख एसएसपी सन्तोष खड्काले मानव अधिकार आयोगसमक्ष बयान दिएका छन् । पूर्वप्रधानन्यायाधीश चोलेन्द्रशमशेर राणालाई भेट्न नदिए पनि उनलाई आयोगले सोधपुछका लागि बोलाएको थियो ।

आयोगसम्मक्ष उनले आफूले हरेक काम आदेशानुसार गरेको भनेका हुन् । उनी केही बेरअघि आयोगबाट बाहिरिएका छन् । आयोग स्रोतका अनुसार उनीमाथिको अनुसन्धान जारी रहेको र प्रारम्भिक चरणको बयानमात्र भएको छ ।

‘पूर्वप्रधानन्यायाधीशको बिनाकारण पक्राउ र आयोगले अनुगमन गर्न जाँदा सम्बन्धित व्यक्तिलाई भेट्ने अनुमति नदिइनु गम्भीर घटना हो, त्यसबारे अनुसन्धान जारी छ’, आयोग स्रोतले भन्यो ।

उक्त घटनाको अनुसन्धानका क्रममा आवश्यकताअनुसार अन्य व्यक्ति र निकायसँग पनि सोधपुछ हुनसक्ने स्रोतले जनाएको छ ।